काठमाडौं । गत वर्षको जेनजी आन्दोलनमा ज्यान गुमाएका अमर सहिदहरूको सम्झनामा निर्माण गरिएका सालिकहरूको अनावरण कार्यक्रम अन्तिम घडीमा आएर अनपेक्षित रूपमा स्थगित भएको छ ।
सातदोबाटोस्थित राष्ट्रिय खेलकुद परिषद् (राखेप) परिसरको पार्कमा राखिएका सालिकहरूसँग सहिदहरूको वास्तविक अनुहार मेल नखाएपछि परिवारजनको कडा विरोधका कारण कार्यक्रम नै रोकिएको हो ।
बुधबार तय गरिएको विशेष अनावरण कार्यक्रमअन्तर्गत ४५ सहिदका सालिकहरू सार्वजनिक गर्ने तयारी गरिएको थियो । तर, अनावरणअघि सालिक अवलोकन गर्न पुगेका सहिद परिवारका सदस्यहरूले मुर्तिमा कुँदिएको अनुहार र आफ्ना प्रियजनको वास्तविक मुहारबीच ठूलो भिन्नता रहेको पाएपछि आपत्ति जनाएका थिए । आफन्तको पहिचान नै झल्किने गरी सालिक नबनेको भन्दै उनीहरूले असन्तुष्टि पोखेपछि विवाद सिर्जना भएको हो ।
परिवारजनको चर्को विरोध र आपत्तिपछि आयोजकले हतारहतार कार्यक्रम स्थगित गर्न बाध्य भएका छन् । अब त्रुटिपूर्ण देखिएका ती सालिकहरूलाई पूर्ण रूपमा सच्याएर तथा सहिदहरूको वास्तविक मुहारसँग मिल्दोजुल्दो बनाइल्यानंतर मात्रै पुनः अनावरण गरिने निर्णय भएको छ ।
