काठमाडौं । नेपाली कांग्रेसले सहकारी ठगीको बिबादमा मुछिएका व्यक्तिलाई मन्त्री बनाएको भन्दै आपत्ती जनाएको छ ।बुधबार प्रतिनिधिसभाको बैठक सुरु हुनेबितिकै कांग्रेस सचेतक सुशीला थिङले वर्तमान मन्त्रिपरिषद्मा विवादास्पद छवि भएका व्यक्ति रहेको भन्दै निष्पक्ष छानविन हुनेमा आशंका जनाउनुभयो ।
उहाले सहकारी ठगीमा विवादास्पद छवि भएका व्यक्तिलाई कारबाही गर्नुको साटो मन्त्री नियुक्त गरेर पुरस्कृत गर्नुभएको आरोप लगाउनुभयो । उहाँले तत्कालीन उपराष्ट्रपति नन्दबहादुर पुनको सचिवालय र उहाँका परिवारका सदस्य सुन तस्करीमा संलग्न भएको देखिएको अवस्थामा कुनै कारबाही नभएको भन्दै सभामुखमार्फत सरकारको ध्यानाकर्षण गराउनुभयो । सचेतक थिङले उपरोक्त सबै विषयमा राम्ररी छलफल नभए आगामी दिनमा सदन प्रभावकारी रुपमा सञ्चालन हुन नसक्ने बताउनुभयो ।
