वीरगञ्ज । आर्थिक रूपमा विपन्न, सिमान्तकृत तथा जेहनदार विद्यार्थीहरूलाई गुणस्तरीय शिक्षामा समान पहुँच विस्तार गर्ने उद्देश्यका साथ वीरगञ्ज महानगरपालिकाले शैक्षिक सत्र २०८३/०८४ का लागि छात्रवृत्ति आवेदन खुला गरेको छ ।
महानगरपालिकाले नगरभित्र सञ्चालित संस्थागत (निजी) विद्यालयहरूमा कक्षा ९ र कक्षा ११ मा निस्शुल्क अध्ययन गर्न इच्छुक विद्यार्थीहरूका लागि औपचारिक रूपमा आवेदन आह्वान गरेको हो ।
महानगरको शैक्षिक प्रशासन महाशाखाले प्रत्येक वर्ष आफ्नो नीति तथा कार्यक्रम अन्तर्गत सञ्चालन गर्दै आएको यस परोपकारी तथा सुधारात्मक छात्रवृत्ति कार्यक्रमलाई यस वर्ष पनि निरन्तरता दिएको हो ।
शैक्षिक प्रशासन महाशाखाका प्रमुख आनन्द लामिछानेका अनुसार छात्रवृत्ति वितरण प्रक्रियालाई पूर्ण रूपमा निष्पक्ष, पारदर्शी र प्रविधिमैत्री बनाउन अनलाइन प्रणाली अवलम्बन गरिएको छ ।
छात्रवृत्ति पाउन इच्छुक र योग्य विद्यार्थीहरूले महानगरपालिकाको आधिकारिक छात्रवृत्ति पोर्टल scholarship.birgunjmun.gov.np मार्फत सहजै आवेदन दिन सक्ने व्यवस्था मिलाइएको छ ।
सूचना प्रकाशित भएबमोजिम बुधबार बिहान १०:०० बजेदेखि खुला भइसकेको यो अनलाइन आवेदन फाराम आगामी जेठ २७ गते राति ११:५९ बजेसम्म भर्न सकिने समयसीमा तोकिएको महाशाखाले जनाएको छ ।
महानगरपालिकाले यस छात्रवृत्ति प्रतियोगितामा सहभागी हुनका लागि निश्चित प्राज्ञिक मापदण्ड समेत निर्धारण गरेको छ । जस अन्तर्गत कक्षा ९ को छात्रवृत्तिका लागि शैक्षिक सत्र २०८२ सालको नगर स्तरीय कक्षा ८ को परीक्षामा सहभागी भई ‘ग्रेडेड’ (उत्तीर्ण) भएका विद्यार्थीहरूले मात्र आवेदन दिन पाउनेछन् ।
त्यसैगरी, कक्षा ११ को छात्रवृत्तिका लागि २०८२ सालकै माध्यमिक शिक्षा परीक्षा (एसईई) मा सहभागी भई ‘ग्रेडेड’ भएका विद्यार्थीहरू आवेदनका लागि योग्य ठहरिनेछन् ।
महाशाखा प्रमुख लामिछानेले आवेदन दिएका विद्यार्थीहरूको हकमा महानगरपालिकाले नै एक विशेष लिखित परीक्षा सञ्चालन गर्ने जानकारी दिए । उक्त परीक्षामा प्राप्त गरेको प्राप्ताङ्क र योग्यताक्रमका आधारमा नै विद्यार्थीहरूलाई संस्थागत विद्यालयहरू मा पूर्ण वा आंशिक छात्रवृत्तिमा अध्ययनका लागि छनोट गरिनेछ ।
विगत केही वर्षदेखि महानगरले निजी विद्यालयहरूले कुल विद्यार्थी सङ्ख्याको १० प्रतिशत छात्रवृत्ति उपलब्ध गराउनुपर्ने कानुनी व्यवस्थालाई कडाइका साथ कार्यान्वयन गर्दै आएको छ, जसका कारण वीरगञ्जका सयौँ गरिब तथा जेहनदार विद्यार्थी हरू महँगो निजी विद्यालयमा निस्शुल्क पढ्न सफल हुँदै आएका छन् ।
