काठमाडौं । मादक पदार्थ सेवन (मापसे) गरेर सवारी साधन चलाउने गैरजिम्मेवार प्रवृत्तिका कारण नेपालका सडकहरू थप असुरक्षित बन्दै गएका छन् । नेपाल प्रहरीका अनुसार गत वैशाख महिनामा मात्रै देशभर मापसेका कारण १२४ वटा गम्भीर सवारी दुर्घटना भएका छन् । ती दुर्घटनाहरूमा परी १२ जनाले अकालमै ज्यान गुमाएका छन् भने १७४ जना यात्रु तथा चालक हरू घाइते भएको दुःखद तथ्याङ्क सार्वजनिक भएको छ ।
नेपाल प्रहरीका केन्द्रीय प्रहरी प्रवक्ता एवं प्रहरी नायब महानिरीक्षक (डीआईजी) अविनारायण काफ्लेले दिएको जानकारी अनुसार प्रादेशिक रूपमा हेर्दा काठमाडौँ उपत्यका र कोशी प्रदेशमा मापसेका कारण सबैभन्दा बढी दुर्घटना भएका छन् ।
वैशाख महिनामा उपत्यकाभित्र मात्रै ३७ वटा सवारी दुर्घटना हुँदा दुई जनाको मृत्यु र ५० जना घाइते भएका छन् भने कोशी प्रदेशमा ३५ वटा दुर्घटनामा दुई जनाको मृत्यु र ५३ जना घाइते भएका छन् ।
यसैगरी मधेस प्रदेशमा २० वटा दुर्घटनामा २७ जना, बागमती प्रदेशमा १२ वटा दुर्घटनामा एक जनाको मृत्यु र १९ जना घाइते तथा गण्डकी प्रदेशमा ५ वटा दुर्घटनामा सबैभन्दा बढी ४ जनाको मृत्यु र ३ जना घाइते भएका छन् । लुम्बिनी प्रदेशमा भएका ९ वटा दुर्घटनामा ३ जनाको मृत्यु र १५ जना घाइते हुँदा कर्णाली र सुदूरपश्चिम प्रदेशमा ३–३ वटा दुर्घटना भई क्रमशः ३ र ४ जना घाइते भएका छन् ।
प्रवक्ता काफ्लेले विशेष गरी रातिको समयमा, सार्वजनिक बिदा तथा विभिन्न पर्व-उत्सवका अवसरमा मापसे गरी सवारी चलाउने क्रम बढी देखिने गरेको बताउँदै यसलाई गम्भीर कानुनी अपराध र मानवीय जीवनका लागि अत्यन्त जोखिमपूर्ण कार्यका रूपमा चित्रण गरे ।
मापसेका कारण चालकको तत्काल निर्णय लिन सक्ने क्षमता कमजोर हुने, सवारी नियन्त्रणमा कठिनाइ हुने र तीव्र गतिमा सवारी कुदाउने प्रवृत्ति बढ्ने भएकाले दुर्घटनाको सम्भावना अत्यधिक रहने गर्दछ। बढ्दो दुर्घटनाको ग्राफलाई मध्यनजर गर्दै ट्राफिक प्रहरीले देशभर मापसे नियन्त्रण अभियानलाई थप आक्रामक र प्रभावकारी बनाएको छ ।
काठमाडौँ उपत्यका ट्राफिक प्रहरी कार्यालयका प्रमुख एवं प्रहरी वरिष्ठ उपरीक्षक (एसएसपी) नवराज अधिकारीका अनुसार मुख्य सहरी क्षेत्र, राजमार्ग, व्यस्त चोक र रातिको समयमा आकस्मिक चेकिङलाई तीव्र पारिएको छ ।
प्रहरीले नियम उल्लङ्घन गर्ने चालकहरूलाई कानुन बमोजिम कडा कारबाही गर्नुका साथै सडक अनुशासन कायम राख्न देशव्यापी रूपमा जनचेतनामूलक कार्यक्रमहरू समेत सञ्चालन गरिरहेको छ । सुरक्षित यात्राका लागि सम्पूर्ण चालक र सर्वसाधारणलाई जिम्मेवार बन्न आग्रह गर्दै ट्राफिक प्रहरीले सडकमा गुड्नु अघि स्टेयरिङ समात्ने हातहरू पूर्ण रूपमा सचेत हुनुपर्नेमा जोड दिएको छ ।
