३१ बैशाख, काठमाडौं । म्यागङ गाउँपालिका–४ किम्ताङमा भएको दुई दाजुभाइको बीभत्स हत्या प्रकरणमा प्रहरीले ६ जनालाई नियन्त्रणमा लिएर अनुसन्धान सुरु गरेको छ ।
किम्ताङबेँसी निवासी ४३ वर्षीय सोमनाथ तामाङ र ३६ वर्षीय सूर्यमान तामाङको शव बुधबार जङ्गलको खोल्सामा ढुङ्गाले थिचेर लुकाइएको अवस्थामा फेला परेपछि प्रहरीले शङ्कास्पद व्यक्तिहरूलाई पक्राउ गरेको हो । जिल्ला प्रहरी कार्यालय नुवाकोटका एसपी विपिन रेग्मीका अनुसार पक्राउ परेकाहरूसँग घटनामा उनीहरूको संलग्नता र हत्याको कारणबारे सघन सोधपुछ भइरहेको छ ।
मङ्गलवार बिहान कुलो बनाउन भनी घरबाट निस्केका दाजुभाइ सम्पर्कविहीन भएपछि खोजी गर्ने क्रममा नुवाकोट र धादिङको सीमा क्षेत्रमा पर्ने किम्ताङ खोलामा उनीहरूको शव भेटिएको थियो । सुरुमा गोली प्रहार गरी हत्या गरिएको अपुष्ट खबर आए पनि प्रहरीले घटनास्थलबाट एउटा खुकुरी बरामद गरेको छ । शवको प्रकृति हेर्दा धारिलो हतियार प्रहार गरी हत्या गरिएको हुनसक्ने आशङ्का गरिए पनि एसपी रेग्मीले पोस्टमार्टम रिपोर्ट आएपछि मात्रै मृत्युको वास्तविक कारण खुल्ने जानकारी दिएका छन् ।
घटनास्थल सडक पहुँचबाट करिब ५ घण्टाको पैदल दूरीमा पर्ने विकट क्षेत्रमा भएकाले प्रहरीलाई अनुसन्धानमा केही चुनौती देखिएको छ । प्रारम्भिक अनुमानअनुसार आर्थिक लेनदेनका कारण यो हत्याकाण्ड भएको हुनसक्ने आशङ्का गरिए पनि प्रहरीले यसको आधिकारिक पुष्टि गरिसकेको छैन ।
पक्राउ परेकाहरूको पहिचान गोप्य राख्दै प्रहरीले घटनाको चुरो पत्ता लगाउन प्राविधिक र स्थलगत दुवै पक्षबाट सुक्ष्म विश्लेषण गरिरहेको जनाएको छ ।
