७ बैशाख, काठमाडौं । नेपाली कांग्रेसभित्रको आन्तरिक विवाद मत्थर हुने संकेत देखिएको छ । पार्टीको केन्द्रीय अनुशासन समितिले निवर्तमान कार्यवाहक सभापति पूर्णबहादुर खड्कालाई सोधेको स्पष्टीकरण फिर्ता लिने तयारी गरेको हो ।
आज दिउँसो ३ बजे बस्ने अनुशासन समितिको बैठकले खड्कालाई सोधिएको स्पष्टीकरण फिर्ता लिने औपचारिक निर्णय गर्नेछ । अनुशासन समितिका संयोजक तारामान गुरुङका अनुसार, खड्काको समूहले सर्वोच्च अदालतको पछिल्लो फैसलालाई स्वीकार गरेपछि पार्टीले लचकता अपनाउँदै स्पष्टीकरण फिर्ता लिन लागेको हो ।
विवादको पृष्ठभूमि र सर्वोच्चको फैसला
यसअघि निर्वाचन आयोगले गगन थापा नेतृत्वको कार्यसमितिलाई मान्यता दिने निर्णय गरेको थियो । उक्त निर्णयविरुद्ध निवर्तमान सभापति शेरबहादुर देउवा र पूर्णबहादुर खड्काले गत माघ २ गते सर्वोच्च अदालतमा रिट दायर गरेका थिए ।
पार्टीको आधिकारिक लाइनविपरीत अदालत गएको भन्दै अनुशासन समितिले वैशाख २ गते खड्कालाई सात दिनको समय दिएर स्पष्टीकरण सोधेको थियो । यद्यपि, गत शुक्रबार सर्वोच्च अदालतले निर्वाचन आयोगको निर्णयलाई सदर गर्दै देउवा र खड्काको रिट खारेज गरिदिएपछि राजनीतिक समीकरण बदलिएको हो ।
