२९ कात्तिक, वीरगञ्ज (पर्सा) । लोकआस्था र पवित्रताको महापर्व छठलाई भव्य, सभ्य, सुरक्षित र मर्यादित वातावरणमा सम्पन्न गर्न जिल्ला प्रशासन कार्यालय पर्साले विशेष सुरक्षा तथा आचारसंहितासम्बन्धी अपिल जारी गरेको छ । छठ पर्वको मुख्य दिन अर्थात् अस्ताउँदो सूर्यलाई अर्घ्य दिने अवसर पारेर प्रशासनले सम्भावित मानवीय तथा भौतिक क्षति न्यूनीकरण गर्न सर्वसाधारणमा उच्च सतर्कता अपनाउन आग्रह गरेको हो ।
पर्साका प्रमुख जिल्ला अधिकारी (सीडीओ) भोला दाहालले छठ पर्वका अवसरमा सम्पूर्ण जिल्लावासीमा हार्दिक शुभकामना व्यक्त गर्दै पर्वको धार्मिक मर्यादा कायम राख्न र कुनै पनि अप्रिय घटना हुन नदिन प्रशासन प्रतिबद्ध रहेको बताए ।
प्रशासनले पर्वको उत्साहका नाममा पटका, आतिसबाजी तथा अन्य प्रज्वलनशील एवं विस्फोटक पदार्थको ओसारपसार, बिक्री वितरण र प्रयोग पूर्ण रूपमा निषेध गरेको छ । यस्ता विस्फोटक पदार्थको प्रयोगले आगलागी तथा मानवीय चोटपटक लाग्ने जोखिम रहेकाले कोही कसैले लुकिछिपी यस्ता गतिविधि गरेको पाइएमा प्रचलित कानुनबमोजिम कडा कारबाही गरिने प्रशासनले स्पष्ट पारेको छ ।
छठ पर्व अत्यन्तै निष्ठा, शुद्धता र पवित्रताका साथ मनाइने धार्मिक अनुष्ठान भएकाले यसको मर्यादा जोगाउन प्रशासनले विशेष कडाइ गरेको छ । सूचनाअनुसार आज (आइतबार) र भोलि (सोमबार, कात्तिक २९ गते) छठ पूजास्थल तथा जलाशय घाट वरपर माछा, मासुलगायतका अभक्ष्य खाद्यवस्तु र सबै प्रकारका मादक पदार्थको बिक्री वितरण तथा सेवन पूर्ण रूपमा बन्द गर्न निर्देशन दिइएको छ । यदि कसैले घाट आसपास मदिरा सेवन गरी होहल्ला वा अवाञ्छित गतिविधि गरेमा तत्काल नियन्त्रणमा लिएर कारबाही प्रक्रिया अघि बढाइने जनाइएको छ ।
छठघाट तथा गहिरा पोखरीहरूमा पूजा र अर्घ्य अर्पण गर्ने क्रममा बालबालिका, ज्येष्ठ नागरिक तथा सर्वसाधारण चिप्लिएर पानीमा डुब्न सक्ने जोखिमलाई मध्यनजर गर्दै अभिभावकहरूलाई विशेष निगरानी राख्न प्रशासनले अनुरोध गरेको छ ।
प्रमुख जिल्ला अधिकारी दाहालले भने, “छठघाटहरूमा हुन सक्ने सम्भावित विपद् तथा पानीमा डुब्ने जस्ता आकस्मिक दुर्घटनामा तत्काल उद्धार गर्न आवश्यक जीवनरक्षक उपकरणसहित नेपाल प्रहरी, सशस्त्र प्रहरी बल र नेपाली सेनाको विपद् व्यवस्थापन टोली चौबीसै घण्टा तयारी अवस्थामा राखिएको छ।”
यता, वीरगञ्जको ऐतिहासिक घडिअर्वा पोखरी तथा रानीघाट छठ पूजा व्यवस्थापन समितिहरूले पनि प्रशासनको निर्णयको स्वागत गर्दै स्वयंसेवक परिचालनलाई तीव्र पारेका छन् । घडिअर्वा छठ पूजा व्यवस्थापन समितिका एक पदाधिकारीले भने, “प्रशासनको यो कदमले पर्वलाई अझ मर्यादित र सुरक्षित बनाउनेछ । हामीले पनि घाट वरपर सरसफाइ, प्रकाशको उचित प्रबन्ध र सुरक्षाकर्मीसँगको समन्वयमा स्वयंसेवक खटाएका छौँ।”
पर्व अवधिभर जिल्लाभरको शान्ति सुरक्षा सुदृढ राख्न स्थानीय प्रशासन, सुरक्षा निकाय, स्थानीय तह र छठ पूजा व्यवस्थापन समितिसँग हातेमालो र समन्वय गर्न प्रशासनले सम्पूर्ण नागरिकमा अपिल गरेको छ ।
