काठमाडौं । उपप्रधानमन्त्री एवं सहरी विकासमन्त्री प्रकाशमान सिंहले सहकारी छानविन समितिको प्रतिवेदनलाई सरकारले पूर्णरुपमा कार्यान्वयन गर्ने बताउनुभएको छ ।
गणेशमान सिंहको २७ औँ पुण्य तिथिको अवसरमा गणेशमान सिंह फाउण्डेशनले बुधबार काठमाडौंमा आयोजना गरेको माल्यार्पण कार्यक्रममा सिंहले समितिको प्रतिवेदन कार्यान्वयन गर्न संसदले सरकारलाई निर्देश गरिसकेकाले सरकारले कार्यान्वयन गर्ने बताउनुभएको हो ।
उहाले समितिको प्रतिवेदनलाई अध्ययन गरेर मन्त्रिपरिषद्बाट कार्यान्वयनका लागि अघि बढ्ने धारणा राख्नुभयो । सिंहले नेपालको परिवर्तन र जनताको अधिकार स्थापीत गर्न स्वर्गीय गणेशमान सिंहले खेल्नुभएको भूमिकाको स्मरण गर्नुभयो ।
सो अवसरमा सिंहले गणेशमान सिंहको प्रतिमामा माल्यार्पण गर्नुभएको थियो । गणेशमानले २०४६ सालमा राष्ट्रिय जनआन्दोलन मा नेतृत्वदायी भूमिका खेल्नुभएको थियो ।
जनआन्दोलन पश्चात तत्कालीन राजा वीरेन्द्र शाहले गणेशमान सिंहलाई प्रधानमन्त्री बन्न आग्रह गर्नुभभएको थियो । तर उहाले प्रधानमन्त्री बन्न अस्वीकार गरी कृष्णप्रसाद भट्टराईलाई प्रधानमन्त्री बनाउनुभएको थियो । नेता सिंहको २०५४ असोज २ गते निधन भएको थियो ।
