१६ बैशाख, काठमाडौं । दुई दिनसम्म अहोरात्र खटेर तयार पारिएको अस्थायी ट्रयाक र डाइभर्सनलाई प्रकृतिले फेरि एकपटक चुनौती दिएको छ ।
बीपी राजमार्गको काभ्रे खण्डमा मंगलबार राति रोशी खोलामा आएको आकस्मिक बाढीले नवनिर्मित डाइभर्सनहरू बगाएपछि यो महत्वपूर्ण सडक सञ्जाल पुनः ठप्प बनेको हो । जिल्ला प्रहरी कार्यालय काभ्रेका अनुसार बाढीको वितण्डा यतिसम्म रह्यो कि चौकीडाँडादेखि माम्तीसम्मका विभिन्न आधा दर्जनभन्दा बढी स्थानमा बनाइएका अस्थायी संरचनाहरू क्षणभरमै नामनिसान नरहने गरी बगेका छन् ।
राजमार्ग अवरुद्ध भएसँगै यात्रामा रहेका सयौँ यात्रु र सवारी साधनहरू बीच बाटोमै अलपत्र परेका छन् । बुधबार बिहानैदेखि काभ्रेको मङ्गलटार, भकुण्डे र धुलिखेल क्षेत्रमा सवारी साधनहरूलाई प्रहरीले होल्ड गरेको छ भने सिन्धुलीतर्फबाट आउँदै गरेका गाडीहरू नेपालथोक र खुर्कोटमै रोकिएका छन् ।
सडक विभाग र सुरक्षा निकायले पुनः डाइभर्सन निर्माणको तयारी थाले पनि तत्कालै सडक सुचारु हुने अवस्था देखिएको छैन । प्रहरीले यात्रुहरूको सुरक्षालाई ध्यानमा राख्दै वैकल्पिक मार्ग प्रयोग गर्न र यात्रामा निस्कनुअघि ट्राफिक अपडेट लिन विशेष आग्रह गरेको छ ।
